Full Stack .NET ծրագրավորման ճամբար 2025
- Դասընթացի սկիզբ
- 6 հոկտեմբերի, 2025
- Դիմումների վերջնաժամկետը
- 1 հոկտեմբերի, 2025
- Ծրագրի տևողություն
- 6-6.5 months
- Տեղեկատվական հանդիպում
- Չորեքշաբթի, հոկտեմբերի 01, 19:00
Ծրագրավորման նոր ճամբար, լավ աշխատանք սկսելու նոր հնարավորություններ։
Այսօրվա ՏՏ ոլորտը զարգանում է աննախադեպ արագությամբ, և ընկերությունները կրտսեր ծրագրավորողներից պահանջում են ավելի բազմակողմանի հմտություններ, քան երբևէ: Եթե մի քանի տարի առաջ բավարար էին միայն տեսական գիտելիքները և նվազագույն պրակտիկ փորձը, այսօր ընկերությունները պահանջում են առավել խորը տեխնիկական հմտություններ, և փափուկ հմտություններ (soft skills)՝ թիմային աշխատանքի, հաղորդակցման էթիկայի և խնդիրների լուծման ունակությունների ձևով:
Մայքրոսոֆթ ինովացիոն կենտրոնը մշակել է բացառիկ բովանդակությամբ ծրագրավորման ճամբար, որը կսովորեցնի մտածել որպես ծրագրավորող, ձեռք բերել տեսական և պրակտիկ հիմնարար գիտելիքներ, մշակել տեխնոլոգիական լուծումներ թիմային միջավայրում, աշխատել իրական նախագծերի վրա, ծանոթանալ ոլորտի լավագույն մասնագետների հետ։
Ծրագրի արդյունավետության ապացույցն է այն հանգամանքը, որ ծրագրավորման նախորդ ճամբարների արդյունքում 1000-ից ավել ուսանողներ աշխատում են տարբեր ընկերություններում` սկսնակից մինչև ավագ ծրագրավորողներ։
Ի՞նչ է իրենից ներկայացնում ծրագրավորման ճամբարը
Մայքրոսոֆթ ինովացիոն կենտրոնի լավագույն մասնագետների կողմից մշակված ինտենսիվ դասընթացներ, որոնք կիրականացվեն հետաքրքիր միջավայրում։
Ճամբարը ներառում է հետևյալ թեմաները՝
- Խորացված C# և .NET միջավայր
- Խորացված տվյալների բազաների ծրագրավորում
- Ամպային հաշվարկներ (Cloud Computing)
- Իրական նախագծերի մշակում:
Երկու ժամ տևողությամբ դասերը լինելու են շաբաթական 3-4 օր, երեկոյան ժամերին։ Սակայն հաջողության կհասնի միայն այն մասնակիցը, ով աշխատասեր է և պատրաստ է օրական ամենաքիչը 4 ժամ տրամադրել ծրագրին։ Ճամբարի ծրագիրը ներկայացված է:
Ո՞վ կարող է մասնակցել ծրագրավորման ճամբարին
Նպատակասլաց մարդիկ, որոնք ցանկանում են զարգանալ ընկերության ներսում և ընկերության հետ։ Մենք փնտրում ենք մարդկանց, որոնք ունեն հետևյալ հատկանիշները՝
- Նվիրված են, ուզում են զարգացնել իրենց մասնագիտական հմտություններն ու թիմի հետ միասին աշխատել հետաքրքիր նախագծերի վրա
- Տեխնիկական գիտությունների և մաթեմատիկայի ֆակուլտետի ավարտական կուրսի ուսանողներ և/կամ շրջանավարտներ են
- Ունեն C#-ի բազային գիտելիքներ
- Պատրաստակամ են աշխատել թիմի հետ
- Ունեն անգլերենի միջին մակարդակի իմացություն։
Ի՞նչ ենք մենք երաշխավորում և ինչո՞ւ մասնակցել
- Արժեքավոր գիտելիքներ
- Գործնական հմտությունները զարգացնելու հիանալի հնարավորություն
- Իրական նախագծերի վրա աշխատելու հնարավորություն
- Նորարար աշխատանքային միջավայր
- Ոլորտի լավագույն մասնագետների հետ շփման հնարավորություն։
Ծանոթացե՛ք Ձեր դասախոսի և մենթորի հետ
Փորձառու մասնագետի մենթորությունը հաջողության կեսն է։ Սուրեն Էդիլյանը ծրագրային ճարտարագետ է։ Ծրագրավորման ոլորտում ունի ավելի քան 10 տարիների փորձ և ոլորտի լավագույն մասնագետներից է։ Մայքրոսոֆթ ինովացիոն կենտրոնում դասավանդում է 2017 թվականից։ 300-ից ավել ուսանողներ հենց նրա շնորհիվ են սովորել ծրագրավորում։
Ինչպե՞ս մասնակցել
Ճամբարի մասնակցությունը խիստ մրցակցային է, և ընդգրկվելու են այն 12-15 մասնակիցները, որոնք հաջողությամբ կհանձնեն թեստն ու կանցնեն հարցազրույցը։ Եթե վստահ ես, որ ուզում ես փորձել ուժերդ, մինչև հոկտեմբերի 1-ը լրացնում ես դիմում-հայտը:
Որքա՞ն արժի ճամբարը։
Ուսման վարձը կազմում է 550,000 ՀՀ դրամ։
Ծրագիրը կսկսվի 2025 թվականի հոկտեմբերի 6-ին և կտևի 6-6,5 ամիս։